Балаҕан ыйын 24 күнүгэр, Таатта сиригэр Саха АССР автономиятын уонна экономиятын олохтоспут, олох дьаһах коммунальнай хаһаайыстыбатын бастакы народнай комиссара, сахалартан бастакы үрдүк үөрэхтээх инженер теплоэнергетик А.К.Андреев төрөөбүтэ 125 сыллаах үбүлүөйүгэр аналлаах тэрээһин Куонаан арыытыгар А.К.Андреев скверыгар СӨ культуратын туйгуна, СӨ Оһуохайга, Олоҥхо Дархан этээччитэ, алгысчыт Афанасий Николаевич Попов алгыһынан саҕаланна. Пааматынньыкка ыалдьыттарбыт, нэһилиэк олохтоохторо тыыннаах сибэккилэри уурдулар, А.Е. Кулаковскай аатынан Дьохсоҕон орто оскуолатын үөрэнээччилэрэ А.К.Андреев олоҕор хоһооннору сэргэхтик аахтылар (сал: М.В.Сивцева, Л.М.Саввина).

П.А.Ойуунускай аатынан Тааттатааҕы норуот айымньытын дьиэтигэр үөрүүлээх чааһа олохтоох оскуола учууталлара Сивцева М.В., Саввина Л.М. суруйбут сценарийдарынан "Улуукан уолбут-хоодуот хотойбут" Дьохсоҕон уус-уран самодеятельноһын туруоруутунан саҕаланна. Олох - дьаһах коммунальнай хаһаайыстыба Ил Түмэн бэрэссэдээтэлэ А.И.Корякин аатыттан Махтал суругу кытта сахалыы иһити саха тылын, литературатын учууталыгар М.В.Сивцеваҕа туттардылар. Генеральнай директор В.С.Чикачев аатыттан Дьохсоҕон орто оскуолатын 11 кылааһын үөрэнээччитигэр Айтал Бабановка, нуучча тылын, литературатын учууталыгар С.Е.Яковлеваҕа, А.К.Андреев аатынан музей салайааччытыгар Г.Е.Арылаховаҕа Махтал суругу кытта түөскэ кэтэр бэлиэлэри туттардылар. Түмүгэр С.Е.Яковлева суруйбут "Норуот туһугар анаммыт олох" 1920-30 сыллардааҕы А.К.Андреев олоҕун сырдатыы литературнай монтаһынан түмүктэннэ. Үбүлүөйдээх дьоһун күммүтүн бары биир киһи курдук нэһилиэк күүһүнэн саба түһэн ыытан тэрээһиммит этэҥҥэ түмүктэммитинэн эҕэрдэ, махтал.
Нэһилиэкпит дьоно- сэргэтэ үбүлүөйгэ анаан биэрбит астарын биир киэһэ түөлбэ салайааччылара барытын кырбаан бэлэмнээн, ЖКХ эр дьонугар, оскуола бары коллективыгар, массыынанан таспыт суоппардарбытыгар, театр үлэһиттэригэр бука барыгытыгар махтал, таптал🙌